گۇناھ-مەئسىيەتلەر ھەر قانداق ياخشىلىقلاردىن مەھرۇم قىلىدۇ

ئىمام ئىبنى قەييىم جەۋزى

كىمكى مۇئمىن مۇسۇلمانلارنىڭ ئۈلپەتچىلىكىدىن ۋە ئۇلارغا بولغان ئىلاھىي مۇداپىئە[1] دىن ئايرىلىپ قالسا، «قۇرئان كەرىم»دە مۇئمىنلەرگە ۋەدە قىلىنغان بارلىق ياخشىلىقلاردىن مەھرۇم قالىدۇ. ئاللاھ تائالا مۇئمىنلەرگە يۈزلەرچە ياخشىلىقلارنى ۋەدە قىلغان بولۇپ، ئۇلاردىن ھەر بىرى دۇنيا ۋە دۇنيادىكى بارلىق نەرسىلەردىن قىممەتلىكتۇر.

1. بۈيۈك ئەجىرلەرگە ئىرىشىدۇ: «ئاللاھ مۇئمىنلەرگە (ئاخىرەتتە جەننەتتىن ئىبارەت) بۈيۈك ئەجىر ئاتا قىلىدۇ.»[2]
2. دۇنيا ۋە ئاخىرەتتىكى يامانلىقلاردىن ساقلىنىپ قالىدۇ: «ئاللاھ مۇئمىنلەرنى چوقۇم قوغدايدۇ، ئاللاھ ھەر قانداق خىيانەتچى، ناشۈكۈر بەندىنى دوست تۇتمايدۇ.»[3]
3. ئەرشنى كۆتۈرگۈچى پەرىشتىلەر ئۇلارنىڭ گۇناھىنى تىلەيدۇ: «ئەرشنى كۆتۈرۈپ تۇرغان ۋە ئەرشنىڭ چۆرىسىدىكى پەرىشتىلەر پەرۋەردىگارىغا تەسبىھ ئېيتىدۇ، ھەمدى ئېيتىدۇ، ئۇنىڭغا ئىمان ئېيتىدۇ، مۇئىمىنلەرگە مەغفىرەت تىلەيدۇ.»[4]
4. ئاللاھ ئۇلارغا ئىگە چىقىدۇ. ئاللاھ ئىگە چىققانلار ھېچقاچان خارلانمايدۇ: «ئاللاھ مۇئمىنلەرنىڭ ئىگىسىدۇر.»[5]
5.  ئاللاھ پەرىشتىلەرنى ئۇلارغا ياردەم بېرىشكە بۇيرۇيدۇ: «ئۆز ۋاقتىدا پەرۋەردىگارىڭ پەرىشتىلەرگە: مەن سىلەر بىلەن بىللە، مۇئمىنلەرنى (ئۇرۇش مەيدانىدا) ساباتلىق قىلىڭلار، دەپ ۋەھىي قىلدى.»[6]
6. پەرۋەردىگارىنىڭ قېشىدا بۈيۈك مەرتىۋىلەرگە، مەغپىرەتكە ۋە پاك رىزىقلارغا ئىرىشەلەيدۇ.
7. ئاللاھ ئۇلارنى غەلىبىگە ئىرىشتۈرىدۇ: « غەلبە ئاللاھقا، ئاللاھنىڭ پەيغەمبىرىگە ۋە مۇئمىنلەرگە مەنسۇپ، لېكىن مۇناپىقلار (غەلبىنىڭ ئاللاھنىڭ دۈشمەنلىرىگە ئەمەس، دوستلىرىغا مەنسۇپ ئىكەنلىكىنى) بىلمەيدۇ.»[7]
8. ئاللاھ ئۇلارنى ئۆز پاناھىغا ئالىدۇ: « ئاللاھ ھەقىقەتەن مۇئمىنلەر بىلەن بىللىدۇر.»[8]
9. ئاللاھ تائالا دۇنيا ۋە ئاخىرەتتە ئۇلارنىڭ مەرتىۋىسىنى يۇقىرى قىلىدۇ: «ئاللاھ سىلەردىن ئىمان ئېيتقانلار ۋە ئىلىم بېرىلگەنلەرنى بىر قانچە دەرىجە يۇقىرى كۆتۈرىدۇ.»[9]
10.   ئاللاھ ئۆز رەھمىتىدىن ئۇلارغا ئىككى كىپىل ئەۋەتىدۇ، ئۇلار بىلەن بىللە ماڭىدىغان نۇر بېرىدۇ ۋە ئۇلارنىڭ گۇناھىنى مەغپىرەت قىلىدۇ.
11.  ئاللاھ تائالا مۇئمىنلەر ئارىسىدا دوستلۇق پەيدا قىلىدۇ. ئاللاھ ئۇلارنى ياخشى كۆرىدۇ. پەرىشتىلىرىگە، پەيغەمبەرلىرىگە ۋە ياخشى بەندىلىرىگە ئۇلارنىڭ مېھرىنى سالىدۇ.
12.   ئەنسىز كۈنلەردە ئۇلارنى ئەمىنلىككە ئىرىشتۈرىدۇ: «ئىمان ئېيتقان ۋە (ئەمەللىرىنى) تۈزىگەن كىشلەرگە غەم قىلىش، قايغۇرۇش يوقتۇر.»[10]
13.  ئۇلار ھەر بىر مۇئمىن-مۇسۇلمان بىر كېچە-كۈندۈزدە ئون يەتتە قېتىم ئاللاھتىن توغرا يول تىلەپ قىلىپ دۇئا قىلىدىغان ئىنئام قىلىنغانلار قاتارىغا داخىل بولىدۇ.
14.   قۇرئان ئۇلارغا ھىدايەت ۋە شىپا بولىدۇ: «ئۇ ئىمان كەلتۈرگەنلەرگە ھىدايەتتۇر ۋە (دىللاردىكى شەك-شۈبھەگە) شىپادۇر، ئىمان ئېيتمايدىغانلارنىڭ قۇلاقلىرى (قۇرئاننى ئاڭلاشتىن) ئېغىردۇر (يەنى قۇرئاننىڭ دەۋىتىگە قۇلاق سالمىغانلارنىڭ ۋە ئۇنىڭدىن يۈز ئۆرۈگەنلەرنىڭ گويا قۇلاقلىرى ئېغىردۇر)، قۇرئان ئۇلارنىڭ (دىللىرىغا) كورلۇقتۇر (يەنى ئۇلار ھىدايەت نۇرىنى كۆرمەيدۇ)، ئەنە شۇلار يىراقتىن نىدا قىلىنغۇچىلاردۇر (يەنى ئۇلار ھەقنى قوبۇل قىلماسلىقتا ئىمانغا يىراقتىن چاقىرىلغان، مۇساپىنىڭ يىراقلىقىدىن چاقىرىقنى ئاڭلىمىغان كىشىلەرگە ئوخشايدۇ).»[11]

دېمەك، ئىمان ھەرقانداق ياخشىلىقنىڭ سەۋەبىدۇر. دۇنيا ۋە ئاخىرەتتىكى بارلىق ياخشىلىقلارغا ئىمان ئارقىلىق ئىرىشكىلى بولىدۇ. دۇنيا ۋە ئاخىرەتتىكى بارلىق يامانلىقلار ئىمانسىزلىقتىن كېلىپ چىقىدۇ. بىر ئادەمنىڭ ئىماندىن ئايرىپ تاشلايدىغان، ئىمان بىلەن ئۆزى ئارىسىغا ھاڭ شەكىللەندۈرىدىغان گۇناھ-مەئسىيەتلەرنى قىلىپ تۇرۇپ، ئومۇمى مۇسۇلمانلارنىڭ دائىرىسىدىن چىقىپ كەتمەسلىكى مۇمكىنمۇ؟!

گۇناھ-مەئسىيەتلەردە ئىزچىل داۋاملاشقان ئادەملەرنىڭ قەلبىنى دات بېسىپ كېتىش، ئاخىرىدا ئىسلامدىن پۈتۈنلەي چىقىپ كېتىش خەۋپى بار. شۇڭلاشقا بۇرۇنلاردا دىننى چۈشەنگەن مۇسۇلمانلار قەلبىنىڭ داتلىشىپ كېتىشىدىن ۋە ئاقىۋەتتە ئىسلامدىن پۈتۈنلەي چىقىپ كېتىشتىن قاتتىق ئەنسىرىگەن ئىكەن. ئۇلارنىڭ بەزىسى مۇنداق دېگەن: «سىلەر گۇناھتىن قورقساڭلار، مەن كاپىرلىقتىن قورقىمەن.»

تەرجىمە قىلغۇچى: مۇھەممەد ئىمىن ھاجىم